Relevo-ს ჟურნალისტმა ტონი ხუანმარტიმ გაავრცელა მოულოდნელი ინფორმაცია, რომლის თანახმადაც, ჟიულ კუნდე "ბარსელონადან" წასვლისთვის მზადაა.

აღნიშნულ ცნობას ადასტურებს ჟერარ რომეროც.

ხუანმარტის თქმით, ფრანგმა მცველმა კლუბს უთხრა, რომ მის სანაცვლოდ მიღებული შეთავაზებები განიხილონ. 24 წლის ფეხბურთელს წასვლა არ უთხოვია, თუმცა იგი ამ შესაძლებლობისადმი ღიაა.

ჟიულის ამ გადაწყვეტილების მიზეზი მისი და მისი გარემოცვის უკმაყოფილობაა. ფრანგს შეჰპირდნენ, რომ იგი "ბარსაში" ცენტრალურ მცველად ითამაშებდა, სეზონის დიდი ნაწილის გატარება კი მარჯვენა მცველის პოზიციაზე მოუწია. ვითარებას კიდევ უფრო ამძიმებს ის ფაქტიც, რომ არაა გამორიცხული, ასე მომდევნო სეზონშიც გაგრძელდეს.

BarcaTimes წერს, რომ "ბარსელონაში" კუნდეს პოზიციონირებით გაკვირვებულნი დარჩნენ და მოთამაშის საქციელს მოუთმენლობის გამოვლინებად მიიჩნევს.

კატალონიური გრანდი ჟიულს დაახლოებით 90 მილიონ ევროდ აფასებს.

შეგახსენებთ, რომ მიმდინარე სეზონში კუნდემ 38 მატჩში მიიღო მონაწილეობა, სადაც თავი 1 გოლითა და 6 ასისტით გამოიჩინა.