როგორც მოგეხსენებათ, გუშინ გავრცელდა ინფორმაცია, რომ "ბარსელონა" "ესპანიოლის" 29 წლის ნახევარმცველით, სერხი დარდერით დაინტერესდა.

Catalunya Radio-ს თანახმად, დარდერს ჩავი ერნანდესი ესაუბრა. მოგვიანებით, ეს ცნობა სხვა წყარომ უარყო, მაგრამ SPORT-ი "ბარსას" თავკაცის ამ ქმედებას ადასტურებს.

ჟურნალისტ სერხი დე ხუანის თქმით, "მაესტრომ" სერხის უთხრა, რომ იგი პედრისა და გავის როტაციაში დაეხმარება.

ესპანელ ნახევარმცველს ისიც უთხრეს, რომ ისეთ ახალგაზრდულ გუნდში, როგორიც "ბარსაა", პოზიტიური ხასიათის ვეტერანი ძალიან გამოსადეგი ფიგურა იქნებოდა.

გამოცდილი ნახევარმცველის გამოსასყიდი თანხა 10 მილიონი ევროა, თუმცა არსებობს შანსი, "ბლაუგრანამ" იგი იჯარის წესით დაიმატოს. 

გასულ სეზონში ჩატარებულ 41 მატჩში დარდერმა თავი 7 გოლითა და 4 ასისტით გამოიჩინა.