ჩავი ერნანდესმა გუშინ "ბარსელონას" ლა ლიგის 46-ე მატჩში უხელმძღვანელა. "მაესტროს" მთავარი მწვრთნელის თანამდებობაზე დანიშვნის შემდეგ, "ლურჯ-ბროწეულისფრებს" პრიმერაში სულ 109 ქულა აქვთ აღებული.

43 წლის სპეციალისტი ამ შედეგით თავის ყოფილ მწვრთნელს, პეპ გვარდიოლას გაუთანაბრდა. პეპმაც "ბარსას" თავკაცის რანგში ჩატარებულ პირველ 46 შეხვედრაში 109 ქულა მოაგროვა.

ერთადერთი, ვისაც კატალონიელები ჩამორჩებიან, ლუის ენრიკეა.

მაშინ, როცა ლუჩომ "ბარსას" პრიმერას 46 მატჩში უხელმძღვანელა, მისი მონაგარი 112 ქულა გახლდათ.

შეგახსენებთ, რომ "ლურჯ-ბროწეულისფერთ" ლა ლიგა გვარდიოლამ სამჯერ მოაგებინა, ლუის ენრიკემ ორი ჩემპიონობა იზეიმა, ხოლო ჩავი გუნდს ახლა თავისთვის პირველი ტიტულისკენ მიუძღვის.