ფერან ტორესი 2023/2024 წლების სეზონს ჩინებულად იწყებს. ამხანაგურ მატჩებში ესპანელმა თავდამსხმელმა 3 გოლით გამოიჩინა თავი და გუნდის საუკეთესო ბომბარდირი გახლდათ, ლა ლიგის ახალ გათამაშებაში კი მეორე ტურშივე შეაგდო.

ფერანმა "კადისის" კარი 92-ე წუთზე, რობერტ ლევანდოვსკის თავური გადაცემის შემდეგ აიღო.

ბევრმა შეამჩნია, რომ ტორესმა თავისი გოლი ტუჩზე საჩვენებელი თითის მიდებით აღნიშნა. ზოგს შეიძლება ჰგონებოდა, რომ 23 წლის ესპანელი თავის კრიტიკოსებს აჩუმებდა, თუმცა საქმე სულ სხვა რამეში ყოფილა.

DAZN-ის ინფორმაციით, "ბარსას" შვიდიანის ჟესტი მისი მეგობრისაკენ გახლდათ მიმართული. მასთან ფერანს სანაძლეო ჰქონდა დადებული, რომელიც, როგორც ჩანს, მოიგო.

აქვე გეტყვით, რომ "ლურჯ-ბროწეულისფერთ" მომდევნო მატჩი 27 აგვისტოს, "ვილიარეალის" წინააღმდეგ ელოდებათ.