კატალონიურ L'Esportiu-სთან ჩაწერილ ინტერვიუში, "ბარსელონას" ახალგაზრდა ფლანგელმა, ალეხანდრო ბალდემ დაადასტურა, რომ კლუბთან ახალი კონტრაქტის გაფორმებაზე მუშაობს.

"დიახ, ჩემი აგენტი კლუბის წარმომადგენლებს შეხვდა. მას 100%-ით ვენდობი. დარწმუნებული ვარ, რომ ჩემი მომავალი აქ არის. აქ დარჩენას მრავალი წლის განმავლობაში ვგეგმავ.

"ლა მასიაში" მაშინ მოვედი, როცა 7 თუ 8 წლის ვიყავი. ახლა 19 წლის ვარ. ეს დიდი დროა და ვიმედოვნებ, კიდევ მეტხანს გაგრძელდება," - თქვა ბალდემ.

19 წლის მარცხენა მცველმა მიმდინარე სეზონში ჩავი ერნანდესის განსაკუთრებული ნდობა მოიპოვა. ლა ლიგის 20 მატჩიდან ალეხანდრომ სასტარტო შემადგენლობაში 15 დაიწყო.

გავრცელებული ცნობების თანახმად, ესპანელი ფლანგელი "ბარსასთან" სულ მცირე 3-წლიან ხელშეკრულებას გააფორმებს.