როგორც მოგეხსენებათ, Spotify-სთან დადებული კონტრაქტი "ბარსელონას" ავალდებულებს, რომ მნიშვნელოვან მატჩებში განსაკუთრებული მაისურებით ითამაშოს.

გასულ სეზონში ეს ორჯერ მოხდა. ლა ლიგის პირველი "კლასიკო" კატალონიელებმა მაისურის წინა მხარეს კანადელი მუსიკოსის, დრეიკის სიმბოლოთი ჩაატარეს, "რეალთან" მეორე მატჩში კი დრეიკი ესპანელმა როზალიამ ჩაანაცვლა.

"სამეფო კლუბის" წინააღმდეგ მომდევნო მატჩი "ბარსას" 29 ოქტომბერს ელოდება და, როგორც ჩანს, უკვე შერჩეულია, თუ ამჯერად რას ვიხილავთ "ლურჯ-ბროწეულისფერთა" ფეხბურთელების მკერდზე.

RAC1-ის ინფორმაციით, "ბარსა" ლეგენდარული როკჯგუფის, "როლინგ სტოუნსის" გერბით ითამაშებს. გარკვეული დეტალები ჯერ კიდევ დასაზუსტებელია, მაგრამ წესით ეს არ უნდა შეიცვალოს.