შესანიშნავად მოგეხსენებათ, რომ ფერან ტორესი ბრწყინვალე ფორმაშია. "ბარსელონას" შვიდიანმა ლა ლიგის ახალ სეზონში უკვე 3 გოლის გატანა მოასწრო - მათ შორის უკანასკნელი "ბეტისთან" უზადოდ შესრულებული საჯარიმო დარტყმა გახლდათ.

23 წლის ფორვარდის მნიშვნელოვანი როლი მოედანზე შეიუარაღებელი თვალითაც აშკარაა, თუმცა, როგორც ირკვევა, ტორესი მოედნის მიღმაც დიდ საქმეს აკეთებს.

Sport-ის ინფორმაციით, ფერანმა ძალიან დიდი წვლილი შეიტანა იმაში, რომ ჟოაუ კანსელუსა და ჟოაუ ფელიქსს ახალ გუნდში თავი კომფორტულად ეგრძნოთ.

კანსელუს ტორესი ჯერ კიდევ "ვალენსიადან" იცნობდა და ისინი "მანჩესტერ სიტიშიც" ერთად თამაშობდნენ. ცხადია, პორტუგალიელ ფლანგელს ამან ადაპტაცია გაუადვილა.

შეგახსენებთ, რომ გუშინდელ მატჩში გოლი არა მარტო ფერანმა, არამედ ორივე ჟოაუამაც შეაგდო.