როგორც მოგეხსენებათ, 2023 წელს "ბარსელონას" ყველა მატჩი აქვს მოგებული. 

ბოლო შეხვედრა, რომელიც "ლურჯ-ბროწეულისფრებმა" ვერ მოიგეს, 2022 წლის 31 დეკემბერს შედგა. მაშინ "ბლაუგრანა" თანაქალაქელ "ესპანიოლს" დაუზავდა.

ამ მომენტისთვის "ბარსას" ყველა ტურნირზე 11-მატჩიანი მოგებათა სერია აქვს.

ირკვევა, რომ გუშინდელი გამარჯვებით ჩავი ერნანდესმა პეპ გვარდიოლას სარეკორდო მაჩვენებელი გაიმეორა. მიჯრით მოგებული მატჩების ყველაზე დიდ რიცხვს პეპის "ბარსასთვის" სწორედ 11 შეადგენდა.

"მაესტროს" თავისი ყოფილი მწვრთნელის შედეგის გაუმჯობესების შანსი ხუთშაბათს, "მანჩესტერ იუნაიტედის" წინააღმდეგ ექნება.

"ბარსასა" და "წითელი ეშმაკების" ჯახი, რომელიც ევროპა ლიგის მეთექვსმეტედფინალური ეტაპის ეგიდით გაიმართება, თბილისის დროით 21:45 საათზე აიღებს სტარტს.