ფრანკ კესიეს გარემოცვა და მისი აგენტი გაბრაზებულნი არიან, - იუწყება Mundo Deportivo.

კოტ-დ'ივუარელი ფეხბურთელთან დაახლოვებული პირების გაღიზიანება იმ ჭორებმა გამოიწვია, რომლებიც ესპანურ პრესაში კესიეს მომავლის შესახებ ვრცელდება.

26 წლის შუახაზელს "ბარსელონაში" დარჩენა და საკუთარი პოზიციისთვის ბრძოლა სურს, გამოცემები კი მას მუდამ უწინასწარმეტყველებენ "კამპ ნოუდან" აბარგებას.

შეგახსენებთ, რომ უკანასკნელ ორ მატჩში ფრანკს დიდი სათამაშო დრო მიეცა. ეს სერხიო ბუსკეტსის ტრავმის გამო მოხდა, ბოძებული შანსი კი კესიემ ჩინებულად გამოიყენა.

ცნობისთვის, "ლურჯ-ბროწეულისფრებმა" გამოცდილი შუახაზელი თავისუფალი აგენტის სტატუსით დაიმატეს.

მიმდინარე სეზონში ჩატარებულ 24 მატჩში კესიემ 2 გოლი და 3 ასისტი მიითვალა.