ჟერარ რომეროსთვის მიცემულ ინტერვიუში, "ბარსელონას" ურუგვაელმა უკანახაზელმა, რონალდ არაუხომ კატალონიურ გრანდში გატარებული პირველი თვეები გაიხსენა და ის ფეხბურთელი დაასახელა, რომელმაც მას დიდი დახმარება გაუწია.

"ლუის სუარესი ადაპტაციის გავლაში ძალიან დამეხმარა. მან თავდაჯერება შემძინა. 

ის ხშირად მესაუბრებოდა, როცა კლუბთან კონტრაქტის გახანგრძლივებაზე ვმუშაობდით," - თქვა არაუხომ.

შეგახსენებთ, რომ არაუხო ბარსელონაში 18 წლის ასაკში ჩავიდა. როგორც ჩანს, მას მფარველობა თანამემამულემ გაუწია.

"ბლაუგრანას" ძირითად გუნდში რონალდის დებიუტი 2019/2020 წლების სეზონში შედგა. "ელ პისტოლერო" მაშინ ჯერ კიდევ "ბარსას" ღირსებას იცავდა, მაგრამ როდესაც რონალდი "ბარსას" საკვანძო ფიგურა გახდა, სუარესი უკვე სხვა გუნდში თამაშობდა.