"ბარსელონას" ურუგვაელ მცველს, რონალდ არაუხოს მიუნხენის "ბაიერნს" აქტიურად უკავშირებენ. დღეს Cadena Ser-მა გაავრცელა ინფორმაცია, რომ "რეკორდმაისტერი" 24 წლის ფეხბურთელში 100 მილიონი ევროს ახლავე გადასახდელადაცაა მზად.

აღნიშნულთან დაკავშირებით კომენტარი არაუხომ "ოსასუნასთან" მატჩისწინა პრესკონფერენციაზე გააკეთა.

"როცა სატრანსფერო ფანჯარა ღიაა, ასეთი საუბარი ყოველთვის მიმდინარეობს. მაგალითად, გასულ ზაფხულს "მანჩესტერ იუნაიტედზე" ლაპარაკობდნენ. მიუხედავად ამისა, კლუბზე ვარ ფოკუსირებული. აქ თავს ბედნიერად ვგრძნობ.

მუდამ მაქსიმალურად ვიხარჯები, როდესაც ამ მაისურის ღირსების დაცვაა საჭირო," - თქვა ახალგაზრდა ვარსკვლავმა.

შეგახსენებთ, რომ მიმდინარე სეზონში რონალდმა 18 მატჩში მიიღო მონაწილეობა. მან თავი 1 გოლით გამოიჩინა.