რამდენიმე დღის წინ გავრცელდა ინფორმაცია, რომ 31 წლის თავისუფალმა აგენტმა, ჯესი ლინგარდმა "ბარსელონას" საკუთარი თავი შესთავაზა.

აღნიშნულ ცნობას დღეს Mundo Deportivo გამოეხმაურა. კატალონიური გამოცემის შეფასებით, ინგლისელი შემტევი ახლა "ბლაუგრანასთვის" ყველაზე ხელმისაწვდომი ფეხბურთელია.

ლინგარდი "ლურჯ-ბროწეულისფრებს" უფასოდ შეუერთდება. გარდა ამისა, ფინანსურ ფეარ პლეისთან დაკავშირებული პრობლემები მის ტრანსფერს არ შეაფერხებს, რადგან ჯესის დაბალი ხელფასი ექნება.

ცხადია, "ბარსასთვის" მთავარი დაბრკოლება ის უნდა იყოს, რომ ინგლისელს ფეხბურთი გასული წლის მაისის შემდეგ არ უთამაშია. უკვე ნახევარ წელიწადზე მეტია, რაც იგი უგუნდოდაა.

ჯესის ბოლო გუნდი "ნოტინგემ ფორესტი" გახლდათ. იქ ჩატარებულ 20 მატჩში მან 2 გოლი და 2 ასისტი მიითვალა.