"პარი სენ ჟერმენთან" მატჩის წინა დღეებში ლამინ იამალს მუცლის ტკივილი სერიოზულად აწუხებდა, - იუწყება ჟერარ რომერო.

მიუხედავად ამისა, 16 წლის შემტევი "ბარსელონას" სასტარტო შემადგენლობაში მაინც მოხვდა და რაფინიას პირველ გოლშიც უდიდესი წვლილი შეიტანა.

ლამინს საუკეთესო შეხვედრა ნამდვილად არ ჩაუტარებია. მასზე ხშირად ჯარიმდებოდნენ, თამაშზე კვალის დამჩნევა კი საკმაოდ უჭირდა. არ გამოვრიცხოთ, რომ ეს წინა დღეების სირთულეებითაც ყოფილიყო განპირობებული.

ჩავი ერნანდესმა იამალი მოედნიდან 61-ე წუთზე გაიყვანა, როცა "ბლაუგრანა" მარცხდებოდა (1:2). ცვლილება წარმატებული გამოდგა, რადგან "მაესტროს" შეგირდებმა თამაში დაატრიალეს.

საბედნიეროდ, იამალი ახლა თავს კარგად გრძნობს.

მიმდინარე სეზონში ჩატარებულ 41 მატჩში ესპანელ ტალანტს 6 გოლი და 7 ასისტი აქვს მითვლილი.