"ბარსელონა" ხვალ მადრიდის "რეალთან" ითამაშებს და ლა ლიგაში მინავლებული საჩემპიონო ინტრიგის გაცოცხლებას ეცდება.

Mundo Deportivo-ს ჟურნალისტ, როხერ ტორელოს თუ დავუჯერებთ, "ლურჯ-ბროწეულისფერთა" სასტარტო შემადგენლობა თითქმის ისეთი იქნება, როგორიც "პარი სენ ჟერმენთან" სამშაბათს ჩატარებულ შეხვედრაში გახლდათ.

ერთადერთი ცვლილება, რომელსაც ჩავი ერნანდესი გეგმავს, ძირითად თერთმეტეულში ანდრეას კრისტენსენის დაბრუნებაა.

დანიელი ფეხბურთელი სათადარიგოთა სკამზე ფრენკი დე იონგს ან პედრის გადასვამს. დიდი ალბათობით, თამაშში მოგვიანებით ჩართვა სწორედ პედრის მოუწევს.

აქვე შეგახსენებთ, რომ "ელ კლასიკო" თბილისის დროით 23 საათზე დაიწყება, მას კი "სანტიაგო ბერნაბეუ" უმასპინძლებს.