როგორც გუშინ მოგახსენეთ, "ბარსელონა" "რეალ სოსიედადის" 27 წლის ესპანელი ნახევარმცველით, მიკელ მერინოთი ინტერესდება. ამ საკითხთან დაკავშირებით დღეს დამატებითი ცნობები გავრცელდა.

Sport-ის ინფორმაციით, "ბლაუგრანა" მზადაა, რომ მერინოში 25 (ფიქსირებული) + 5 (ბონუსები) მილიონი ევრო გადაიხადოს. ბასკურ კლუბს მიკელთან კონტრაქტის გახანგრძლივება უნდა, რათა გაისად მისი უფასოდ დაკარგვის შანსი აღმოფხვრას.

გამოცდილი შუახაზელისგან ევროპის ჩემპიონატის დასრულებამდე არაფერს უნდა ველოდოთ.

მერინოს სან სებასტიანელთა შეთავაზება მაგიდაზე უდევს, თუმცა "ბარსელონას" ინტერესზე იცის და იმასაც შესანიშნავად ხვდება, რომ "ლურჯ-ბროწეულისფერთა" რიგებში გადასვლით ჩემპიონთა ლიგაზე თამაში შეეძლება.

აღსანიშნავია, რომ "სოსიედადის" ფეხბურთელსა და პაუ კუბარსის ერთი და იგივე აგენტი ჰყავთ. ამ აგენტთან "ბარსას" შესანიშნავი ურთიერთობა აქვს.

რაც შეეხება მიკელის ტაქტიკურ მახასიათებლებს, "ბლაუგრანაში" ყველა შეთანხმდა, რომ იგი ჰანსი ფლიკის 4:2:3:1 სისტემისთვის შესანიშნავი დანამატი იქნება.

გასულ სეზონში ჩატარებულ 45 მატჩში ბასკური გუნდის ნახევარმცველმა 8 გოლი და 5 ასისტი მიითვალა.