"ალ ჰილალის" მთავარ მწვრთნელს, ჟორჟე ჟესუსს თავის გუნდში რაფინიას ხილვა სურს, - იუწყება Mundo Deportivo.
პორტუგალიელმა სპეციალისტმა უკვე დაიწყო ტრანსფერზე ზრუნვა. იგი "ბარსელონასაც" დაუკავშირდა და 27 წლის გარემარბის ახლო გარემოცვის წევრებსაც.
წყაროს თანახმად, "ბლაუგრანადან" ჟესუსს შეუთვალეს, რომ 90 მილიონ ევროზე ნაკლები ღირებულების წინადადებას არც კი განიხილავენ. ისე კი, "ლურჯ-ბროწეულისფერთა" მიზანი რაფინიაში 100 მილიონი ევროს აღებაა.
ფული საუდის არაბული კლუბისთვის პრობლემას არ წარმოადგენს, მაგრამ მათი მთავარი ამოცანა რაფინიას დარწმუნება იქნება.
"ალ ჰილალის" კოზირი იმ შეთავაზებაშია, რომლითაც ისინი ბრაზილიელს მიმართავენ. როგორც ირკვევა, რაფინიას უკვე შეუთვალეს, რომ საუდიში იმაზე გაცილებით დიდ ხელფასს დაუნიშნავენ, ვიდრე იგი "ბარსაში" იღებს.
აქვე გეტყვით, რომ "ბარსელონას" რაფინიას გაყიდვა დასჭირდება, რათა დეკუს სასურველი შემტევი შეიძინოს. საუბარია "ლივერპულის" ვარსკვლავ ლუის დიასზე, რომელიც "ლურჯ-ბროწეულისფრების" რიგებში თამაშზე ოცნებობს.
