"ბარსელონას" პრეზიდენტის, ჟოან ლაპორტას კლუბში დაბრუნებას წარმატებული ნამდვილად არ ეთქმის, თუმცა, როგორც ჩანს, კატალონიელი სხვა აზრზეა.

SPORT-ის ინფორმაციით, ლაპორტა გეგმავს, რომ 2026 წლის საპრეზიდენტო არჩევნებშიც მიიღოს მონაწილეობა.

როგორც ირკვევა, "ბლაუგრანას" პრეზიდენტს უნდა, რომ თავის საარჩევნო კამპანიას დიდი ტრანსფერი დაამთხვიოს, რათა სოსიოების ხმები მოიზიდოს. ერთ-ერთი ვარიანტი კლუბს უკვე შერჩეული ჰყავს.

საუბარია "მანჩესტერ სიტის" არგენტინელ ფორვარდ ხულიან ალვარესზე, რომელსაც "ლურჯ-ბროწეულისფრებს" ადრეც უკავშირებდნენ.

24 წლის შემტევს "ქალაქელებთან" კონტრაქტი 2028 წლის ივლისამდე აკავშირებს. Transfermarkt-ზე იგი 90 მილიონ ევროდაა შეფასებული.

გასულ სეზონში ჩატარებულ 58 მატჩში ალვარესმა თავი 20 გოლითა და 13 ასისტით გამოიჩინა.