როგორც მოგეხსენებათ, "ბარსელონას" ესპანელ შემტევებს აქტიურად უკავშირებენ. კლუბის რადარზე მიმდინარე ევროპის ჩემპიონატის ორი გამორჩეული ფეხბურთელი, ნიკო უილიამსი და დანი ოლმო იმყოფება.
Carrusel-ის ინფორმაციით, "ბლაუგრანას" ოლმო დიდი ხანია მოსწონს, მაგრამ პრიორიტეტი ნიკო უილიამსია. თუ კლუბი დიდი ტრანსფერის განხორციელებას გადაწყვეტს, ეს ნიკო იქნება.
"ფურია როხას" ვარსკვლავების შესახებ დაწერა Sky Germany-ის ჟურნალისტმა, ფლორიან პლეტენბერგმაც.
"ნიკო უილიამსი "ბარსას" სერიოზულ სამიზნედ რჩება. ამ ეტაპზე, კატალონიელებმა ჯერ თავიანთი ფეხბურთელები უნდა გაყიდონ. ჰანსი ფლიკი ნიკოს თავის გუნდში სიამოვნებით ნახავდა. მხარეთა შორის კონტაქტი უკვე შედგა.
"ბლაუგრანას" სიაშია დანი ოლმოც, თუმცა ამ ორ მოთამაშეს განსხვავებული მახასიათებლები აქვთ," - წერს პლეტენბერგი.
შეგახსენებთ, რომ 20 ივლისამდე, "ლაიფციგის" 26 წლის ნახევარმცველის გამოსასყიდი თანხა 60 მილიონი ევრო იქნება. რაც შეეხება ბილბაოს "ატლეტიკის" 21 წლის ვარსკვლავს, მისი გამოსასყიდი თანხა 58 მილიონი ევროა, ოღონდ იგი რაიმე დამატებითი ვადით შეზღუდული არ გახლავთ.
