ესპანეთის ნაკრები ევრო 2024-ის ჩემპიონია! ფინალურ მატჩში "ფურია როხამ" ინგლისის ეროვნულ გუნდს 2:1 მოუგო.

შეხვედრის სამივე გოლი მეორე ნახევარში გავიდა. თავი ჯერ ნიკო უილიამსმა გამოიჩინა, ანგარიში კი შეცვლაზე შემოსულმა კოულ პალმერმა გაათანაბრა. თითქოს ყველაფერი დამატებითი ტაიმებისკენ მიდიოდა, როცა 86-ე წუთზე მარკ კუკურელიას ჩაწოდებას ფეხი შედეგიანად მიკელ ოიარსაბალმა დაუხვედრა.

"ფურია როხასთვის" ეს ევროპის მე-4 ჩემპიონობაა, ინგლისელებმა კი ფინალი ზედიზედ მეორედ წააგეს.

ტურნირის საუკეთესო ახალგაზრდად ლამინ იამალი დასახელდა, ხოლო საუკეთესო ფეხბურთელად - როდრი.

აქვე გეტყვით, რომ იამალმა ევრო 2024 1 გოლითა და 4 საგოლე გადაცემით დაასრულა. ასისტი მან 5-დან 4 სტადიაზე მიითვალა - ჯგუფური ეტაპის მატჩშიც, მერვედფინალშიც, მეოთხედფინალში და ფინალში.