როგორც მოგეხსენებათ, "ბარსელონამ" ნიკო უილიამსისა და დანი ოლმოს ერთსა და იმავე სატრანსფერო ფანჯარაზე შეძენა გადაწყვიტა. ეს იმას ნიშნავს, რომ კატალონიელები ცენტრალური ნახევარმცველის პოზიციაზე შედარებით იაფ ფეხბურთელს დაიმატებენ.
საყრდენის გუნდში მოყვანა "ლურჯ-ბროწეულისფერთა" პრიორიტეტულ ამოცანად მიიჩნეოდა, მაგრამ მოცემულობა შეცვლილია.
SPORT-ის ჟურნალისტის, ტონი ხუანმარტის ინფორმაციით, ერთ-ერთ ხელმისაწვდომ ვარიანტად "ბლაუგრანაში" საფრანგეთის ნაკრების შუახაზელი, ნგოლო კანტე ესახებათ.
33 წლის ფეხბურთელი ევრო 2024-ზე შესანიშნავად გამოიყურებოდა. სწორედ ევროპის ჩემპიონატზე მისმა პერფომანსებმა დააფიქრა კატალონიური გრანდი ტრანსფერზე.
წყაროს თანახმად, "ბარსასთვის" იდეალური ვარიანტი ნგოლოს იჯარის წესით დამატება იქნებოდა, თუმცა "ალ იტიჰადი" ამაზე თანახმა არ იქნება. ფრანგით "ვესტ ჰემიცაა" დაინტერესებული.
"ალ იტიჰადი" კანტესთან განშორების სურვილს საერთოდ არ აჩენს. იმ შემთხვევაში, თუ კლუბს გაშვება თავად ნგოლომ არ მოსთხოვა, მის მიერ გუნდის შეცვლის ალბათობა არც ისე დიდად უნდა მივიჩნიოთ.
გასულ სეზონში ჩატარებულ 44 მატჩში გამოცდილი ნახევარმცველი 4 გოლითა და 6 ასისტით გამოირჩა.
