რობერტ ლევანდოვსკი 36 წლის გახდა.

პოლონელი ახლა "ბარსელონას" ისტორიაში ყველაზე ხანდაზმული თავდამსხმელია. ასაკით ყველაზე უფროს ფეხბურთელებს შორის, რომლებსაც "ბლაუგრანაში" უთამაშიათ, რობერტი მე-8 ადგილზეა, მის წინ კი მხოლოდ მცველები (დანი ალვეში, ხოსე რამონ ალეხანკო, ხოან სეგერა, მიჩელი, ლილიან ტურამი) და მეკარეები (ხოსე მანუელ პინტო, ანტონი რამალეცი) არიან.

ამ სიაში პირველ ადგილზე გადასასვლელად ლევანდოვსკის "ლურჯ-ბროწეულისფერთა" რიგებში კიდევ 3 წლის გატარება მოუწევს. რეკორდსმენი ალვეშის შედეგი 39 წელი და 16 დღეა.

"ბარსას" ცხრიანს კლუბთან კონტრაქტი 2026 წლის ივლისამდე აკავშირებს, თუმცა მასში 1 წლით გახანგრძლივების ოფციაცაა ჩადებული.

აქვე გეტყვით, რომ "ბლაუგრანას" მაისურით ჩატარებულ 96 მატჩში რობერტმა 61 გოლი გაიტანა.