ნეიმარს "ბარსელონაში" ნებისმიერ ფასად დაბრუნება სურს, - იუწყება ჟოან ფონტესი.

წყაროს თანახმად, ბრაზილიელ ვარსკვლავს "ბლაუგრანაში" დაბრუნების იმედი ილქაი გიუნდოგანის წასვლასთან დაკავშირებულმა ხმაურმა აღუძრა.

სანდო წყაროებს "ალ ჰილალის" შემტევის ეს სურვილი არ დაუდასტურებიათ, თუმცა ნეიმარს კატალონიაში დაბრუნებისკენ გული ყოველ წელს მიუწევდა ხოლმე, ამიტომ მსგავსი წადილი ახლაც რომ ამოძრავებდეს, გასაკვირი არ უნდა იყოს.

ცხადია, "ლურჯ-ბროწეულისფერთა" რთული ფინანსური მდგომარეობიდან გამომდინარე, ნეის კვლავ მათ რიგებში თამაში გამორიცხულად უნდა მივიჩნიოთ.

შეგახსენებთ, რომ ნეიმარი "ალ ჰილალს" 2023 წლის ზაფხულში შეუერთდა, მალევე კი უმძიმესი ტრავმა მიიღო, რამაც 271 დღე გამოატოვებინა. მოედანზე იგი ახლახანს დაბრუნდა.