როგორც მოგეხსენებათ, "ბარსელონას" ბრაზილიელმა გარემარბმა რაფინიამ კარიერაში პირველი ჰეთ თრიქი შეასრულა. 27 წლის ფეხბურთელმა 3 გოლი "ვალიადოლიდის" კარში გაიტანა.

გუშინდელი შეხვედრა რაფინიასთვის კიდევ ერთი რამის გამო იყო გამორჩეული.

საქმე იმაში მდგომარეობს, რომ მატჩის მიწურულს, ყოველ ჯერზე, როცა ბრაზილიელი ბურთს მიიღებდა, "ესტადიო ლუის კომპანისის" ტრიბუნები სიტყვა "კაპიტანს" სკანდირებდნენ.

როგორც ჩანს, "ბლაუგრანას" გულშემატკივრებს რაფინიას ერთ-ერთ კაპიტნად დანიშვნის გადაწყვეტილება მოეწონებათ.

შეგახსენებთ, რომ ბრაზილიელი ახლა "ბარსას" მე-4 კაპიტანია მარკ-ანდრე ტერ შტეგენის, რონალდ არაუხოსა და ფრენკი დე იონგის შემდეგ.

ამ ყველაფერმა "ლურჯ-ბროწეულისფერთა" გარემარბის თავდაჯერებაც გაზარდა. Mundo Deportivo-ს ჟურნალისტის, როხერ ტორელოს ინფორმაციით, რაფინია ახლა თავს მნიშვნელოვნად გრძნობს და ეს მის თამაშზეც აისახება.