"ბარსელონას" პოლონელმა თავდამსხმელმა, რობერტ ლევანდოვსკიმ პოლონურ Kanal Sportiwy-ს ვრცელი ინტერვიუ მისცა, სადაც რამდენიმე საინტერესო საკითხს შეეხო.

36 წლის ცენტრფორვარდმა როგორც განახლებული "ბლაუგრანას", ასევე თავისი მიზნების შესახებაც ისაუბრა. ინტერვიუდან ვიგებთ, რომ "ლურჯ-ბროწეულისფერთა" ცხრიანს ამ სეზონში გოლების კონკრეტული რაოდენობის გატანა აქვს ჩაფიქრებული.

"რამდენი გოლის გატანა მინდა ამ სეზონში? რა თქმა უნდა, მინდა, რომ წინა სეზონზე მეტი გოლი გავიტანო.

მიზანი 30 გოლზე მეტი იქნება. შეიძლება, 35-იც. ეს გუნდზეცაა დამოკიდებული. იმედი მაქვს, რომ ისინი ბევრ საგოლე მომენტს შემიქმნიან, რათა მეტოქის კარი ხშირად ავიღო ხოლმე," - თქვა რობერტმა.

შეგახსენებთ, რომ ლევანდოვსკიმ ლა ლიგის ახალი გათამაშება ჩინებულად დაიწყო. 4 ტურში მას 4 გოლი აქვს გატანილი და ბომბარდირთა დავას ლიდერობს.

ახლა რობერტი პოლონეთის ნაკრების შეკრებაზეა. 5 სექტემბერს პოლონელები შოტლანდიას დაუპირისპირდებიან, 8 სექტემბერს კი ხორვატიასთან ელოდებათ მატჩი.