"ბარსელონას" 20 წლის ნახევარმცველი, პაბლო გავი გუნდთან ერთად ვარჯიშს დაუბრუნდა. ბოლო 11 თვეში ეს პირველი შემთხვევაა, როდესაც პაბლო თანაგუნდელების მხარდამხარ ვარჯიშობს.

Diario AS-ის ჟურნალისტის ინფორმაციით, თუ რაიმე გაუთვალისწინებელი არ მოხდა, "ლურჯ-ბროწეულისფერთა" ვარსკვლავს სამედიცინო შტაბი მწვანე შუქს 15 დღეში აუნთებს.

რა თქმა უნდა, ეს იმას არ ნიშნავს, რომ ჰანსი ფლიკი გავის მოედანზე დაუყონებლივ დააბრუნებს.

წინასწარ გაცხადებული სტრატეგიის თანახმად, "ბარსა" პაბლოს რაც შეიძლება ფრთხილად მოეპყრობა. ძველ ფორმაში იგი ნაბიჯ-ნაბიჯ ჩადგება.

შეგახსენებთ, რომ 2023 წლის ნოემბერში გავის ჯვარედინი მყესები გაუწყდა და მენისკი დაუზიანდა. ეს ესპანეთისა და საქართველოს ნაკრებებს შორის ჩატარებულ მატჩში მოხდა.