ლა ლიგის პრეზიდენტმა, ხავიერ ტებასმა, "ბარსელონასა" და ყოფილი მსაჯის, ენრიკე ნეგრეირასთან დაკავშირებული საქმის პოტენციურ შედეგებზე ისაუბრა.
ამის შესახებ მან მედიას განუცხადა: "ვფიქრობ, ნეგრეირას საქმეში "ბარსელონა" დაისჯება, მაგრამ არა ისე, როგორც მადრიდში ამბობენ. ეს სპორტული კორუფციის საქმეა და არა მსაჯების მოსყიდვის.
"დღემდე არ არის დადასტურებული, რომ "ბარსელონა" მსაჯებს ანაზღაურებას აძლევდა და არა მგონია, ეს საერთოდ ოდესმე დადასტურდეს. მათ გადაუხადეს ნეგრეირას, რომელმაც გავლენა იქონია მსაჯების დაწინაურებაზე და დაქვეითებაზე. ეს რა თქმა უნდა, სპორტული კორუფციაა, მაგრამ არა მსაჯების მოსყიდვა."
ნაკლებად სავარაუდოა, რომ "ბარსას" ნეგრეირას საქმეზე მძიმე სასჯელი დაეკისროს მას შემდეგ, რაც ჟოან ლაპორტამ და კლუბის წევრებმა წარმოადგინეს მტკიცებულება, რომლის მიხედვითაც, მათ არ განუხორციელებიათ რაიმე ქმედება მსაჯებზე უშუალოდ რომელიმე მატჩის ბედის გადასაწყვეტად.
ამ ეტაპზე, ჯერ კიდევ არ არის განსაზღვრული, თუ როდის გამოვა განაჩენი აღნიშნულ საქმეზე, თუმცა ფაქტია, კლუბის სასჯელი არც თუ ისე მძიმე იქნება.
