"ბარსელონას" ბრაზილიელი გარემარბი, რაფინია ჰანსი ფლიკის ხელში ფანტასტიკურად გამოიყურება. 27 წლის შემტევმა ზაფხულში გუნდის შეცვლაზე კატეგორიული უარი განაცხადა, რაც "ბლაუგრანას" ბევრ ქომაგს არ ესიამოვნა, თუმცა რაფინიამ ეს სეზონი ისე დაიწყო, რომ ამით უკმაყოფილო აღარავინ უნდა იყოს.
ამ ფონზე, ესპანურმა Relevo-მ "ლიდსიდან" შეძენილი ფეხბურთელის მიერ "ლურჯ-ბროწეულისფერთა" რიგებში გატარებული სეზონი გაგვახსენა.
წყაროს თანახმად, რაფინიას ჩავისთან ხშირად ჰქონდა უთანხმოება ხოლმე. ამის მიზეზი მისი ნაადრევი შეცვლები გახლდათ.
"ბლაუგრანას" შემტევზე დიდი გავლენა ჰქონდა იმ კრიტიკასაც, რომელიც მას გულშემატკივრებისგან ხვდა წილად. Relevo წერს, რომ ბრაზილიელს მძიმე პერიოდის გადატანა მოუწია.
სამაგიეროდ, ყველაფერი ცუდი ახლა წარსულშია დატოვებული. რაფინიას კაპიტნის სტატუსიც აქვს მიღებული და ერთადერთი, რაშიც კლუბიდან "აკრიტიკებენ", ზედმეტი სირბილია.
GPS მონაცემებმა აჩვენა, რომ რაფინია გუნდში ყველაზე მეტს დარბის და პრესინგის დროს, აჩქარებებს ყველაზე ხშირად მიმართავს. ამან შეიძლება ტრავმაც განაპირობოს, ამიტომ ბრაზილიელს ტექნიკურმა გუნდმა ურჩია, ოდნავ ნაკლები ირბინოს.
ცნობისთვის, ამ სეზონში "ბარსას" 11 ნომრის მონაგარი 5 გოლი და 3 ასისტია.
