"ბარსელონა" ლისაბონის "ბენფიკას" მარცხენა მცველით, ალვარო კარერასით ინტერესდება, - იუწყება პორტუგალიური O Jogo.

21 წლის ფეხბურთელი იმყოფება მადრიდის "რეალისა" და "მანჩესტერ იუნაიტედის" რადარებზეც. აღსანიშნავია, რომ "წითელ ეშმაკებს" ალვაროს გამოსყიდვის უფლებაც აქვთ.

კარერასით დაინტერესება ნაწილია იმ პოლიტიკისა, რომლის გატარებასაც "ლურჯ-ბროწეულისფერნი" აპირებენ. "ბლაუგრანა" აქცენტს ახალგაზრდებზე გააკეთებს და მათ პირველ გუნდში ინტეგრირებას ეცდება. სამიზნედ მოიაზრება "ლევანტეს" მოთამაშე, მარკ პუბილიც.

"არწივების" ესპანელ ფლანგელს მიმდინარე სეზონში 9 მატჩში აქვს მონაწილეობა მიღებული. მის ანგარიშზე საგოლე მოქმედება არ ფიქსირდება.

აქვე გეტყვით, რომ კარერასს "ბენფიკასთან" კონტრაქტი 2029 წლის ივლისამდე აკავშირებს.