მიმდინარე სანაკრებო პაუზის შემდეგ, "ბარსელონამ" ლევანდოვსკისა და იამალის სახით ორი ახალი დაშავებული ფეხბურთელი მიიღო. საბედნიეროდ, არც ერთის ტრავმა დიდ საფრთხეს არ წარმოადგენს. 

მიუხედავად იმისა, რომ პოლონელმა ფორვარდმა ხორვატიასთან მატჩის შემდეგ მიანიშნა, რომ კარგად იყო, ჰანსი ფლიკმა სიტუაციის მიმართ შესაძლოა ცოტა სიფრთხილე გამოიჩინოს და გუნდის ორი მთავარი ვარსკვლავი მომდევნო მატჩში დაასვენოს. 

ეს კი იმას ნიშნავს, რომ დიდი შანსია, გერმანელმა სპეციალისტმა, 20 ოქტომბერს, "სევილიას" წინააღმდეგ მატჩში იამალი და ლევანდოვსკი ძირითადი შემადგენლობის მიღმა დატოვოს. 

ეს ყველაფერი კი იმიტომ, რომ "ბარსას" ამის შემდეგ ორი ურთულესი და ძალიან მნიშვნელოვანი მატჩი ელის, ერთია ჩემპიონთა ლიგაზე მიუნხენის "ბაიერნის" წინააღმდეგ, შემდეგ კი "ელ კლასიკო", სადაც ბუნებრივია, ხსენებული ორი ფეხბურთელის ყოფნა გუნდისთვის სასიცოცხლო მნიშვნელობის იქნება. 

ფლიკისთვის საბედნიეროდ, ამ ეტაპზე მას არჩევანის საშუალება აქვს. თუ რომელიმე მათგანი სრულ მზადყოფნაში არ იქნება, "სევილიასთან" მატჩს დიდი ალბათობით, ანსუ ფატი და პაუ ვიქტორი დაიწყებენ.