"ბარსელონამ" მიუნხენის "ბაიერნთან" 6-მატჩიანი წაგებათა სერია ფანტასტიკურ სტილში მოპოვებული გამარჯვებით დაასრულა. "ლურჯ-ბროწეულისფრებმა" მიუნხენელებს 4 გოლი გაუტანეს, თავიანთ კარში კი მხოლოდ ერთი მიიღეს.

კატალონიელთა წარმატება იმ უდიდესი ძალისხმევის დამსახურებაა, რომელიც ფეხბურთელებმა ამ შეხვედრაში ჩადეს. Whoscored-ის მონაცემებით, "ბარსას" მოთამაშეებმა ჯამურად 126.55 კილომეტრი ირბინეს, "რეკორდმაისტერის" მაჩვენებელი კი 120.58 კმ გახლდათ.

კიდევ უფრო თვალშისაცემია სხვაობა "ბარსელონას" მიერ 2020 წელს ჩატარებულ მატჩთან. თამაშში, რომელიც "ბლაუგრანამ" 2:8 წააგო, მოთამაშეებმა 98 კმ დაფარეს. მაშასადამე, ფლიკის შეგირდებს წუხელ 28 კილომეტრით მეტი ურბენიათ.

ცხადია, "ბარსას" მთავარმა მწვრთნელმა ყველაზე კარგად იცის გაწეული შრომის შესახებ. Diario AS-ის ჟურნალისტის, ხავი მიგელის ინფორმაციით, ფეხბურთელებს მატჩის დასრულებიდან 12 საათის მერეც კი ეტყობოდათ დაღლილობა.

აქედან გამომდინარე, ჰანსი ფლიკმა სავარჯიშო სესიის ინტენსივობა მნიშვნელოვნად შეამცირა. "ახლა დასვენების დროა, კარგად გამოიძინეთ და ძალები აღიდგინეთ!" - ასეთი იყო საერთო მესიჯი.

შეგახსენებთ, რომ მომდევნო დაპირისპირება კატალონიელებს მადრიდის "რეალთან" ელოდებათ. "სანტიაგო ბერნაბეუზე" ჩასატარებელი "კლასიკო" 26 ოქტომბერს, თბილისის დროით 23 საათზე დაიწყება.