თუ "ბარსელონა" მომდევნო ზაფხულს ცენტრფორვარდის ყიდვას გადაწყვეტს, მთავარი პრიორიტეტი ვიქტორ გიოკერეში იქნება, - იუწყება SPORT-ის ჟურნალისტი, ტონი ხუანმარტი.

წყაროს თანახმად, "ბლაუგრანასა" და ლისაბონის "სპორტინგის" ცხრიანის ბანაკს შორის პირველადი კონტაქტები უკვე დამყარებულია.

მიუხედავად ამისა, ყველაფერი მაინც რობერტ ლევანდოვსკის მომავალზე იქნება დამოკიდებული.

26 წლის შვედი ახლა ევროპის ყველაზე მოთხოვნადი შემტევია. "ლომები" მას ძალიან ძვირად აფასებენ, თუმცა, მოარული ხმების მიხედვით, ფეხბურთელსა და კლუბს შორის არსებობს ჯენტლმენური შეთანხმება, რომ მას წასვლის უფლებას 60-70 მილიონ ევროდ მისცემენ.

ვიქტორს აქტიურად უკავშირებენ "მანჩესტერ იუნაიტედსაც".

მიმდინარე სეზონში ჩატარებულ 18 მატჩში გიოკერეშმა 23 გოლი და 4 ასისტი მიითვალა.