"ბარსელონას" ფრანგი მარჯვენა მცველი, ჟულ კუნდე "ესპანიოლთან" 3 ნოემბერს გამართული მატჩის სასტარტო შემადგენლობაში ვერ მოხვდა, რაც მაშინ ბევრმა ფეხბურთელთა როტაციით ახსნა.

Diario AS-ის ჟურნალისტს, ხავი მიგელს თუ ვენდობით, აღნიშნული გადაწყვეტილების მოტივი სულ სხვაა.

წყაროს თანახმად, კუნდე "ბლაუგრანას" მთავარმა მწვრთნელმა, ჰანსი ფლიკმა დასაჯა. ამის მიზეზი ისაა, რომ 26 წლის ვარსკვლავმა მატჩისწინა, გუნდურ გასაუბრებაზე 1 წუთით დააგვიანა.

ძირითად თერთმეტეულში ჟული ჰექტორ ფორტმა ჩაანაცვლა, "ბარსამ" კი 3:1 მოიგო.

ფრანგი ფლანგელი სასტარტოში მომდევნო მატჩშივე დაბრუნდა და "ცრვენა ზვეზდასთან" ასისტების ჰეთ თრიქიც შეასრულა. მიმდინარე სეზონში კუნდეს მონაგარი 1 გოლი და 4 საგოლე გადაცემაა.