"ბარსელონამ" წუხელ "ლას პალმასთან" წააგო და სერიოზული საფრთხის ქვეშ დადგა, რომ ლა ლიგის სატურნირო ცხრილში პირველობა დაკარგოს, რადგან მადრიდის "რეალთან" უპირატესობა 4 ქულაა, თუმცა "სამეფო კლუბს" მათზე 2-ით ნაკლები მატჩი აქვს ჩატარებული.

გუშინდელი შეხვედრა "ლურჯ-ბროწეულისფერთათვის" პირველი გახლდათ მას შემდეგ, რაც კლუბს დაარსებიდან 125 წელი შეუსრულდა (29 ნოემბერს). ცხადია, მატჩს საზეიმო ელფერიც სდევდა თან, რომელიც კანარელებთან წაგებამ გააუფერულა.

როგორც აღმოჩნდა, მნიშვნელოვანი თარიღების მერე დამარცხება "ბარსასთვის" ერთგვარი ტრადიციაა. მოცემულობა შემდეგნაირია:

"ბარსელონას" დაარსებიდან 25 წლისთავზე, გუნდმა "ტერასასთან" 0:1 წააგო. როდესაც კატალონიელებს 50 წელი შეუსრულდათ, მომდევნო მატჩი მათ "ესპანიოლთან" დათმეს, ანგარიშით 2:1, ხოლო 1999 წელს, დაარსებიდან 100 წლის იუბილეს აღნიშვნის შემდეგ, მადრიდის "ატლეტიკოსთან" დაიჩაგრნენ - 0:1.

აქვე შეგახსენებთ, რომ ჰანსი ფლიკის გუნდის შემდეგი მეტოქე "მალიორკა" იქნება. ჯახი 3 დეკემბერს, თბილისის დროით 22 საათზე დაიწყება.