"ბარსელონას" ურუგვაელი მცველი, რონალდ არაუხო დორტმუნდის "ბორუსიასთან" გასამართი მატჩის განაცხადში მოხვდა.

Mundo Deportivo-ს ინფორმაციით, ჰანსი ფლიკს სურს, 25 წლის ფეხბურთელი "ბლაუგრანას" დაცვის ხაზში რაც შეიძლება მალე და ეფექტურად დააბრუნოს, რადგან ლა ლიგის ბოლო 5 მატჩში გუნდმა 8 გოლი გაუშვა.

"ლურჯ-ბროწეულისფერთა" სამწვრთნელო შტაბში ფიქრობენ, რომ უკანა ხაზს აგრესიული ფიგურა აკლია, რონალდი კი სწორედ ასეთია.

ამიტომაც მიიჩნევენ "ბარსაში" არაუხოს დაბრუნებას ეგზომ მნიშვნელოვნად. ჯერ არ ვიცით ისიც, თუ ვინ უნდა ჩაანაცვლოს მან სასტარტო შემადგენლობაში.

აქვე გეტყვით, რომ დიდი ალბათობით, ურუგვაელი ხვალ სათადარიგოთა სკამზე დარჩება. მოედანზე მას 15 დეკემბერს, "ლეგანესის" წინააღმდეგ ვიხილავთ.