ბოლო წლებში პირველად, "ბარსელონა" წინასასეზონო ტურნეს აშშ-ში არ ჩაატარებს. Catalunya Radio იუწყება, რომ კატალონიელები აზიას ეწვევიან. ისინი თითო მატჩს იაპონიაში, ჩინეთსა და სამხრეთ კორეაში ითამაშებენ.

წყაროს თანახმად, ამ ტურნედან "ბლაუგრანა" 20 მილიონ ევროს მიღებას იმედოვნებს.

დიდი ალბათობით, არ შედგება ლამის ტრადიციად ქცეული ამხანაგური "ელ კლასიკოც". "ლურჯ-ბროწეულისფრები" მთელ აქცენტს მეტ ფინანსურ სარგებელზე აკეთებენ, ამისთვის კი მათ აზიურ ქვეყნებში ჩასვლა განიზრახეს.

ტურნეს შესახებ ისეთი დეტალები, როგორებიცაა მატჩების გამართვის თარიღები, ადგილები და მეტოქეები, მომდევნო კვირებში გახდება ცნობილი.

დღევანდელი მოცემულობით, "ბარსა" ტოკიოში, ბეიჯინგში და სეულში აპირებს ჩასვლას.