ლამინ იამალი მადრიდის "ატლეტიკოსთან" ვერ ითამაშებს, - იუწყება RAC1.

17 წლის შემტევს პრობლემა ისევ კოჭის არეში აქვს. ამ დაზიანებამ ესპანელ ვარსკვლავს 3 შეხვედრა გამოატოვებინა, ახლა კი ლა ლიგის საჩემპიონო რბოლის ერთ-ერთ გადამწყვეტ ჯახსაც გამოაკლებს.

დღეს დილას იამალს დამატებითი გამოკვლევები ჩაუტარდა, რომლის პასუხები ასევე მალე იქნება ცნობილი.

შეგახსენებთ, რომ ლამინმა ტკივილი "ლეგანესთან" წაგებული შეხვედრის პირველ ტაიმში იგრძნო. მიუხედავად ამისა, მან მოედანზე 75 წუთი გაატარა.

"ატლეტიკოს" კატალონიელები შინ 21 დეკემბერს, თბილისის დროით 23:59 საათიდან მიიღებენ.