"ბარსელონას" ფეხბურთელებმა მიზნად ესპანეთის სუპერთასის მოგება დაისახეს, - იუწყება Diario AS-ის ჟურნალისტი, ხავი მიგელი.

წყაროს თანახმად, გუნდის ერთ-ერთმა ვეტერანმა შემდეგი რამ თქვა: "ახლა დავისვენებთ, ძალებს აღვიდგენთ და 2025 წელს სუფთა ფურცლიდან დავიწყებთ. ისე, თითქოს არაფერი მომხდარა. სეზონის პირველი ტიტული უნდა მოვიგოთ. ფლიკთან ვალში ვართ."

როგორც ჩანს, ბოლოდროინდელი ცუდი შედეგების გადაფარვას კატალონიელები ესპანეთის სუპერთასის დაუფლებით აპირებენ.

ნახევარფინალურ მატჩს "ბარსა" 8 იანვარს, ბილბაოს "ატლეტიკის" წინააღმდეგ ჩაატარებს. 9 იანვარს მადრიდის "რეალი" "მალიორკასთან" ითამაშებს. ფინალი 12 იანვარსაა ჩანიშნული.

შეგახსენებთ, რომ "ბლაუგრანას" ესპანეთის სუპერთასი 14-ჯერ აქვს მოგებული. ეს საუკეთესო მაჩვენებელია.