"ბარსელონას" 20 წლის თავდამსხმელის, ანსუ ფატის აგენტი ჟორჟე მენდეში დღეს ბარსელონაში ჩაფრინდა.

პორტუგალიელმა აგენტმა აეროპორტში შეკრებილ ჟურნალისტებს დაუდასტურა, რომ კატალონიას "ლურჯ-ბროწეულისფერთა" ათიანის მომავლის გასარკვევად ეწვია.

"აქ ანსუს ოჯახთან სალაპარაკოდ ჩამოვედი.

ანსუ დიდებული ფეხბურთელია და სანამ ტრავმას მიიღებდა, "ბარსელონაში" ყველას დაანახა თავისი ფასი. 

ვნახოთ, რა მოხდება," - განაცხადა მენდეშმა.

შეგახსენებთ, რომ ესპანურ პრესაში გავრცელებული ბოლო ცნობების თანახმად, "ბარსას" ესპანელი შემტევის ზაფხულში გაყიდვა აქვს გადაწყვეტილი. მენდეში "ბლაუგრანას" 70-მილიონიანი შეთავაზების მიტანას ჰპირდება.

მიმდინარე სეზონში ფატის ანგარიშზე 7 გოლი და 3 ასისტია.