სერხიო ბუსკეტსმა დაადასტურა, რომ სეზონის ბოლოს "ბარსელონას" დატოვებს. 

დასტური მივიღეთ "ბლაუგრანასგანაც" - კატალონიური გრანდის ოფიციალურ გვერდზე გამოქვეყნდა ვიდეო, სადაც სერხიო თავისი გადაწყვეტილების შესახებ საუბრობს.

შეგახსენებთ, რომ ბუსკეტსი "ბარსას" ძირითად გუნდში 2008 წელს დააწინაურეს და იგი "ლურჯ-ბროწეულისფერთა" საკვანძო ფიგურად იქცა.

"ბლაუგრანას" მაისურით სერხიოს 719 მატჩში მიუღია მონაწილეობა. ამ მაჩვენებლით ის მხოლოდ ლეო მესისა (778) და ჩავი ერნანდესს (767) ჩამორჩება.

ბუსკეტსის აქტივშია 18 გოლი, 45 საგოლე გადაცემა, 8 ლა ლიგა, 3 ჩემპიონთა ლიგა, 3 საკლუბო მუნდიალი, 7 კოპა დელ რეი, 3 ევროპის სუპერთასი.

გამოცდილი შუახაზელი "ლურჯ-ბროწეულისფერთა" რიგებში კიდევ 5 მატჩს ჩაატარებს, ივნისიდან კი ახალი კლუბის ძებნას დაიწყებს.