"ბარსელონა" ლა ლიგის 2022/2023 წლების სეზონის ჩემპიონია! ჩავი ერნანდესის გუნდმა ჩემპიონობა მოსისხლე მტრის, "ესპანიოლის" დამარცხებით გაინაღდა.

"კორნელია ელ პრატიზე" გამართული მატჩი "ლურჯ-ბროწეულისფრებმა" ანგარიშით 4:2 მოიგეს. "ბლაუგრანას" გოლები რობერტ ლევანდოვსკის (დუბლი), ალეხანდრო ბალდესა და ჟიულ კუნდეს ანგარიშზეა.

საფინალო სასტვენის შემდეგ კატალონიელებმა ტიტულის აღნიშვნა ზედ "ესპანიოლის" მოედანზე გადაწყვიტეს, თუმცა, როგორც აღმოჩნდა, ეს არც ისე კარგი იდეა იყო.

მაშინ, როცა "ბარსას" ფეხბურთელებმა წრე შეკრეს და მოედნის ცენტრის გარშემო ცეკვავდნენ, საფეხბურთო მინდორზე "თუთიყუშების" გულშემატკივრები შეიჭრნენ.

"ბარსელონას" მოთამაშეები მაშინვე სტადიონის გვირაბისკენ გაეშურნენ და ახლა უსაფრთხოდ იმყოფებიან. "ესპანიოლის" ფანებმა გასახდელში შეჭრა უშედეგოდ სცადეს. მათ უამრავი სკამი დალეწეს.

აქვე გეტყვით, რომ ეს "ბლაუგრანას" ისტორიაში ლა ლიგის 27-ე ტიტულია. რაც შეეხება "ესპანიოლს", უდიდესი ალბათობით, გუნდი ესპანეთის პირველი დივიზიონიდან გავარდება.